164

احمدی نژاد نے قبل از وقت پارلیمانی اور صدارتی انتخابات کا مطالبہ کردیا

ایران کے سابق صدر محمود احمدی نژاد نے سپریم لیڈر آیت اللہ علی خامنہ ای سے ملک میں قبل از وقت صدارتی اور پارلیمانی انتخابات کرانے کا مطالبہ کیا ہے۔ ایرانی ذرائع ابلاغ میں شائع ہونے والے ایک بیان میں محمود احمدی نژاد کا کہنا ہے کہ ملک کو موجودہ سیاسی بحران سے نکالنے کا واحد حل قبل از وقت پارلیمانی اور صدارتی انتخابات ہیں۔ ’دولت بہار‘ ویب سائیٹ پر سپریم لیڈر کے نام احمدی نژاد کا ایک مکتوب شائع کیا گیا ہے۔ اس میں کہا گیا ہے کہ ملک کو موجودہ بحران سے نکالنے کے لیے فوری طورپر صدارتی اور پارلیمانی انتخابات کا انعقاد ضروری ہے۔ اس کے ساتھ ساتھ جوڈیشل کونسل کے سربراہ کو اس کے عہدے سے ہٹایا جائے۔حراست میں لیے گئے تمام مظاہرین کو فوری رہا کیا جائے ’انجینیرڈ‘ انتخابات سے روکنے کے لیے دستوری کونسل کے انتخابی عمل میں عمل دخل کو روکا جائے‘۔ انہوں نے جوڈیشل کونسل کے سربراہ کو ان کے عہدے سے فوری طورپر برطرف کرنے کا مطالبہ کیا اور کہا کہ عدلیہ کا سربراہ کسی غیر جانب دار اور قابل قبول شخص کو ہونا چاہیے۔ سابق صدر نے کہا کہ انتخابات کی صورت میں سیکیورٹی اداروں کی کسی قسم کی مداخلت ختم کی جائے اور شہریوں کی بلا جواز پکڑ دھکڑ کی مہمات بند کی جائیں۔ خیال رہے کہ حال ہی میں ایرانی صدر حسن روحانی نے ملک کو موجودہ بحران سے نکالنے کے لیے عوامی سطح پر ریفرنڈم کرانے کی تجویز پیش کی تھی۔

اس خبر پر اپنی رائے کا اظہار کریں

اپنا تبصرہ بھیجیں